Headlines

മുണ്ടെയുടെ കാറപകടത്തില്‍ ദുരൂഹത, പിന്നില്‍ രാഷ്ട്രീയ എതിരാളികളെന്ന് ആരോപണം

ബി ജെ പി നേതാവും കേന്ദ്രമന്ത്രിയുമായ ഗോപിനാഥ് മുണ്ടെയുടെ മരണത്തിന് കാരണമായ കാറപകടത്തില്‍ ദുരൂഹതയെന്ന് ബി ജെ പി നേതാക്കള്‍ സംശയിക്കുന്നതായി സൂചന. മഹാരാഷ്ട്രയിലെ മുതിര്‍ന്ന ബി ജെ പി നേതാക്കളാണ് മുണ്ടെയുടെ മരണത്തിനിടയാക്കിയ അപകടത്തില്‍ അട്ടിമറി സാധ്യതകള്‍ സംശയിക്കുന്നത്. ഇതിലെ സത്യാവസ്ഥ പുറത്തുകൊണ്ടുവരുന്നതിന് സി ബി ഐ അന്വേഷണം വേണമെന്നും ചില നേതാക്കള്‍ ആവശ്യപ്പെട്ടു.

മുണ്ടെയുടെ മരണത്തിന് പിന്നില്‍ ദുരൂഹതയുണ്ടെന്ന ആരോപണവുമായി ബി.ജെ.പി നേതാവ് അവധൂത് വാഗ് നേരത്തെ തന്നെ രംഗത്തെത്തിയിരുന്നു. മോഡിയുടേയും മുണ്ടെയുടേയും വിജയം രുചിക്കാത്തവരാണ് ഗൂഡാലോചനക്ക് പിന്നിലെന്നും അവധൂത് വാഗ് ആരോപിച്ചു.

ജനങ്ങള്‍ ഈ അപകടത്തിന് പിന്നില്‍ ദുരൂഹതയുണ്ടെന്ന് വിശ്വസിക്കുന്നവരാണ്. സ്വാഭാവിക മരണമാണോ അസ്വാഭാവിക മരണമാണോ എന്നത് സംബന്ധിച്ച് വിശദീകരണം നല്‍കേണ്ടത് പോലീസാണ്. സാധാരണഗതിയില്‍ അതീവ സുരക്ഷിതത്വമുള്ള കാറില്‍ സഞ്ചരിക്കാറുള്ള മുണ്ടെ അപകടം നടന്നപ്പോള്‍ എങ്ങനെയാണ് സാധാരണ കാറില്‍ സഞ്ചരിച്ചതെന്നും അവധൂത് വാഗ് ചോദിക്കുന്നു.

അരബിന്ദോ ചൗക്കില്‍ നിന്നും ട്രാഫിക് സിഗ്നല്‍ തെറ്റിച്ചുവന്ന ഒരു ഇന്‍ഡിക്ക കാറാണ് മുണ്ടെയുടെ കാറില്‍ ഇടിച്ചത്. മാരുതി സുസുകി എസ് എക്‌സ് 4 ലായിരുന്നു ഗോപിനാഥ് മുണ്ടെ സഞ്ചരിച്ചിരുന്നത്. മുണ്ടെ ഇരുന്ന അതേ ഭാഗത്താണ് ഇന്‍ഡിക കാര്‍ വന്ന് ഇടിച്ചത്. ഇടിയുടെ ആഘാതത്തില്‍ മുണ്ടെ സീറ്റിലേക്ക് വീഴുകയായിരുന്നു. ഇന്‍ഡിക കാറിന്റെ ഡ്രൈവറെ നാട്ടുകാര്‍ പിടിച്ചുവെച്ച് പോലീസില്‍ ഏല്‍പ്പിച്ചിട്ടുണ്ട്.

അദ്ദേഹം ഇരുന്ന ഭാഗത്താണ് വാഹനം ഇടിച്ചത്. ഇടതുവശത്തുകൂടിയാണ് ഈ വാഹനം ഗോപിനാഥ് മുണ്ടെയുടെ കാറിനെ മറികടന്നതെന്നും അവധൂത് വാഗ് പറഞ്ഞു.

കാണിപ്പയ്യൂരിന്റെ പ്രവചനം ശരിയായി? ദേശീയ നേതാവ് മരിച്ചു

കേന്ദ്രത്തില്‍ അധികാരത്തിലെത്തുന്ന സര്‍ക്കാറിലെ ഒരു ഉന്നത നേതാവ് കൊല്ലപ്പെടുമെന്ന കാണിപ്പയ്യൂര്‍ നാരായണന്‍ നമ്പൂതിരി നേരത്തെ പ്രവചിച്ചിരുന്നു. ഇത് ശരിവയ്ക്കുന്നതാണ് ഇപ്പോള്‍ മുണ്ടേയുടെ മരണം. കഴിഞ്ഞ വിഷുഫലം പ്രവചിച്ചപ്പോഴാണ് കാണിപ്പയ്യൂര്‍ നാരായണന്‍ നമ്പൂതിരി കേന്ദ്രഭരണത്തെക്കുറിച്ച് പ്രവചനങ്ങള്‍ നടത്തിയത്.

ഉന്നതനായ ഒരു ഭരണാധികാരിയുടെ അകാല മരണം ഭരണ സംവിധാനത്തില്‍ അപാകതകളുണ്ടാക്കുവാന്‍ സാധ്യതയുണ്ടെന്നായിരുന്നു അദ്ദേഹത്തിന്റെ പ്രവചനം . മേട സംക്രമം മിഥുന വ്യാഴത്തില്‍ ആയതിനാലും സേനാധിപതി സൂര്യനാവുന്നതിനാലും ഈ വര്‍ഷം ഭരണത്തിലിരിക്കുന്നവര്‍ തമ്മില്‍ അഭിപ്രായ ഭിന്നയുണ്ടാകുമെന്നും ജ്യോതിഷി അന്ന് പ്രവചിച്ചിരുന്നു.

കേന്ദ്ര സര്‍ക്കാരിന് ഒരു വര്‍ഷമേ ആയുസുണ്ടാകൂവെന്നും അടുത്ത ഏപ്രില്‍ മെയ് മാസത്തോടെ ഭരണ പതനമോ അനിഷ്ടാവസ്ഥയോ സംജാതമാകുമെന്നുമാണ് കാണിപ്പയ്യൂരിന്റെ പ്രവചനങ്ങള്‍.

വിദ്യാര്‍ത്ഥിനികളുടെ ചിത്രമെടുത്ത് നഗ്നശരീരം മോര്‍ഫുചെയ്യും; ഒരുചിത്രത്തിന്‌ 30 രൂപ !

കോലഞ്ചേരി: പട്ടിമറ്റം സ്വദേശിയായ വിദ്യാര്‍ഥിനിയുടെ ചിത്രം മോര്‍ഫ്‌ ചെയ്‌തു പ്രചരിപ്പിച്ച കേസില്‍ കുന്നത്തുനാട്‌ പൊലീസ്‌ അറസ്‌റ്റു ചെയ്‌ത അന്യ സംസ്‌ഥാന തൊഴിലാളി നൂര്‍ ഇസ്ലാ(22)മിനെ കോലഞ്ചേരി കോടതി പതിനാലു ദിവസത്തേക്കു റിമാന്‍ഡ്‌ ചെയ്‌തു.

അസമിലെ നൊഗാമു ജില്ലയിലെ മൊടാര്‍ത്തലൈ സ്വദേശിയാണ്‌. ഇയാള്‍ പെണ്‍കുട്ടി അറിയാതെ മൊബൈല്‍ ഫോണില്‍ ചിത്രമെടുത്തശേഷം അത്താണിയിലെ കംപ്യൂട്ടര്‍ സ്‌ഥാപനത്തില്‍ മോര്‍ഫിങ്‌ നടത്തി ഇതര സംസ്‌ഥാന തൊഴിലാളികള്‍ക്കിടയില്‍ പ്രചരിപ്പിക്കുകയായിരുന്നു. നാട്ടുകാര്‍ കടയില്‍ പരിശോധന നടത്തിയപ്പോള്‍ ഇതടക്കം ഒട്ടേറെ മലയാളി യുവതികളുടെ മോര്‍ഫ്‌ ചെയ്‌ത വിഡിയോ ദൃശ്യങ്ങള്‍ കണ്ടെത്തി.

മേസ്‌തിരിപ്പണിക്കാരനായ ഇയാള്‍ കേരളത്തിലെത്തിയതു രണ്ടു വര്‍ഷം മുന്‍പാണ്‌. പ്രായപൂര്‍ത്തിയാകാത്ത പെണ്‍കുട്ടി ഒരാഴ്‌ച മുന്‍പു വീട്ടിലേക്കു നടന്നുപോകുമ്പോഴാണ്‌ ഇയാള്‍ ചിത്രം പകര്‍ത്തിയത്‌. രാവിലെ ആറു മുതല്‍ എട്ടര വരെയും വൈകിട്ട്‌ അഞ്ചര മുതല്‍ രാത്രി പത്തുവരെയുമായിരുന്നു ഇയാളുടെ കംപ്യൂട്ടര്‍ സ്‌ഥാപനത്തിന്റെ പ്രവര്‍ത്തനം. ഇയാള്‍ക്കു പ്രൈമറി വിദ്യാഭ്യാസം മാത്രമേയുള്ളൂ. ഇതര സംസ്‌ഥാന തൊഴിലാളികള്‍ക്കു 30 രൂപ നിരക്കിലാണു മോര്‍ഫ്‌ ചെയ്‌ത ചിത്രം പകര്‍ത്തിനല്‍കിയിരുന്നത്‌. പാട്ടുകള്‍ പകര്‍ത്തി നല്‍കുന്നുവെന്ന വ്യാജേനയാണ്‌ അശ്ലീല ചിത്രങ്ങളുടെ വിപണനം നടത്തിയിരുന്നത്‌.

നേരത്തെ മൊബൈല്‍ ഫോണ്‍ വഴി ചിത്രം പകര്‍ത്തിനല്‍കിയിരുന്ന പ്രതി കംപ്യൂട്ടറും അനുബന്ധ ഉപകരണങ്ങളും വാങ്ങി ബിസിനസ്‌ വ്യാപകമാക്കുകയായിരുന്നു. കംപ്യൂട്ടര്‍ അടക്കമുള്ള ഉപകരണങ്ങള്‍ പൊലീസ്‌ പിടിച്ചെടുത്തിട്ടുണ്ട്‌. ഇവിടെനിന്നു മലയാളികളുടെ തിരിച്ചറിയല്‍ കാര്‍ഡുകള്‍, ആധാര്‍ കാര്‍ഡുകള്‍, പാസ്‌പോര്‍ട്ട്‌ സൈസ്‌ ഫോട്ടോ തുടങ്ങിയവയും പൊലീസിനു ലഭിച്ചു. സൈബര്‍ സെല്ലിന്റെ പരിശോധനകള്‍ പൂര്‍ത്തിയായാല്‍ മാത്രമേ ചിത്രങ്ങള്‍ ദുരുപയോഗിച്ചതു സംബന്ധിച്ചു കൂടുതല്‍ വിവരങ്ങള്‍ ലഭ്യമാകുകയുള്ളൂ. സംഭവത്തെ തുടര്‍ന്ന്‌ ഇതര സംസ്‌ഥാന തൊഴിലാളികളെ നാട്ടുകാര്‍ ഒഴിപ്പിച്ചുതുടങ്ങി.

യോ യോ ഹണി സിംഗിനെ ഓണ്‍ലൈന്‍ പാപ്പരാസികള്‍ കൊന്നത് എങ്ങനെ ?

മുംബൈ: ഇന്ത്യന്‍ സംഗീത രംഗത്തെ പുത്തന്‍ താരോദയം യോ യോ ഹണി സിംഗിനെ കൊല്ലാതെ കൊന്നു! വാര്‍ത്ത കേട്ട് അതിശയിക്കേണ്ട. നിരവധി ഹിറ്റ് ഗാനങ്ങളിലൂടെ ബോളിവുഡിലും കോളിവുഡിലും ശ്രദ്ധേയനായ ഹണി സിംഗ് മരിച്ചെന്ന വാര്‍ത്ത നല്‍കിയാണ് ചില ഓണ്‍ലൈന്‍ പോര്‍ട്ടലുകള്‍ ആരാധകരെ ഞെട്ടിച്ചത്.

ആരാധകരുടെ നെഞ്ചില്‍ തീകോരിയിടത്തക്കവണ്ണം വാര്‍ത്തയോടൊപ്പം ഹണി സിംഗിന്റെ  ചിത്രം കൂടിയായപ്പോള്‍ ആരാധകരുടെ നെഞ്ചിടിപ്പ് വീണ്ടും കൂടി. ഒടുവില്‍ ഉദ്വേഗങ്ങള്‍ക്ക് വിരാമമിട്ട് വാര്‍ത്ത തെറ്റെന്ന് ഹണിസിംഗ് തന്നെ ട്വിറ്ററിലൂടെ അറിയിച്ചപ്പോഴാണ് ആരാധകരുടെ ഞെട്ടല്‍ വിട്ടുമാറിയത്.

ഒരു കാര്‍ അപകടത്തില്‍ ഹണിസിംഗ് മരിച്ചെന്നായിരുന്നു വാര്‍ത്ത. ഗുരുതര പരിക്കേറ്റ് കോമയില്‍ കഴിയുന്ന ഹണിയുടെ ചിത്രം കൂടിയായപ്പോള്‍ കാര്യം ഗൗരവമായി മാറി. ഹണിസിംഗ് അഭിനയിക്കുന്ന ബ്രിംഗ്മീ ബാക്ക് എന്ന പുതിയ സംഗീത ആല്‍ബത്തിനു വേണ്ടിയുള്ള ചിത്രമായിരുന്നു യഥാര്‍ത്ഥമെന്നു കരുതി പ്രചരിച്ചത്.

ചുരുങ്ങിയ കാലം കൊണ്ട് നിരവധി ഹിറ്റു ഗാനങ്ങള്‍ സമ്മാനിച്ച ഹണി സിംഗ് മലയാളികള്‍ക്കും സുപരിചിതനാണ്. ലുങ്കി ഡാന്‍സ്,? എതിര്‍നീച്ചല്‍,? പാര്‍ട്ടി വിത്ത് ഭൂത്‌നാഥ്  എന്നീ ഗാനങ്ങള്‍ ഹണിസിഗിന്റെ ഹിറ്റ് ലിസ്റ്റില്‍ ഉള്‍പ്പെടുന്നു. സമാനമായ തരത്തില്‍ മുന്‍പും ചലച്ചിത്ര ലോകത്തെ പ്രമുഖര്‍ മരിച്ചതായി വ്യാജവാര്‍ത്തകള്‍ പരന്നിട്ടുണ്ട്.

മകളുടെ അച്ഛന്‍ യുവനേതാവ്: സരിതയുടെ വെളിപ്പെടുത്തലിന് മറുപടി നല്‍കുമെന്ന് ബിജു

സോളാര്‍ തട്ടിപ്പ് കേസിലെ പ്രതി സരിത എസ് നായരുടെ പുതിയ വെളിപ്പെടുത്തലുകള്‍ക്ക് ഉടന്‍ മറുപടി നല്‍കുമെന്ന് ഭര്‍ത്താവ് ബിജു രാധാകൃഷ്ണന്‍. സരിതയുടെ ആരോപണങ്ങള്‍ക്കുള്ള മറുപടി ബുധനാഴ്ച പറയും. ഇക്കാര്യത്തില്‍ തനിക്ക് പറയാനുള്ള കാര്യങ്ങള്‍ അമ്പലപ്പുഴ കോടതിയില്‍ ബോധിപ്പിക്കുമെന്നും ബിജു അറിയിച്ചു.

സോളാര്‍ തട്ടിപ്പുകേസില്‍ തലശ്ശേരി കോടതിയില്‍ ഹാജരാക്കിയപ്പോഴായിരുന്നു ബിജു രാധാകൃഷ്ണന്‍ ഇങ്ങനെ പ്രതികരിച്ചത്. ഒരു വാരികയ്ക്ക് അനുവദിച്ച പ്രത്യേക അഭിമുഖത്തില്‍ തന്റെ മകളുടെ അച്ഛന്‍ രാഷ്ട്രീയ യുവനേതാവാണെന്ന് സരിത വെളിപ്പെടുത്തിയിരുന്നു. ബിജു നിര്‍ബന്ധിച്ചാണ് തന്നെ സ്ഥാപനത്തില്‍ ജോലിചെയ്യിപ്പിച്ചിരുന്നതെന്നും സരിത പറഞ്ഞിരുന്നു.

'ഓണ്‍ലൈന്‍ കൂടോത്ര' തട്ടിപ്പുമായി ടെക്കികള്‍

കൊച്ചി: ഓണ്‍ലൈന്‍ കൂടോത്ര തട്ടിപ്പുകളുമായി ഐടി പ്രഫഷണലുകള്‍ സജീവമാകുന്നു. മതങ്ങളുടെ പേരില്‍ അരങ്ങേറുന്ന കൂടോത്രങ്ങളും അവയ്‌ക്കുള്ള മറുമരുന്നുമായി ഓണ്‍ലൈന്‍ വ്യാജ സന്യാസികള്‍ വിലസുകയാണ്‌. തട്ടിക്കൂട്ട്‌ സൈറ്റുകള്‍ മുതല്‍ തികച്ചും പ്രഫഷണലായി നടത്തുന്ന മന്ത്രവാദസൈറ്റുകള്‍ വരെ സുലഭം.

ജയ്‌പൂര്‍, ചെന്നൈ, കൊല്‍ക്കത്ത, മുംബൈ എന്നിവിടങ്ങളില്‍ നിന്നുള്ള മന്ത്രവാദികളാണ്‌ ഓണ്‍ലൈന്‍ കൂടോത്രക്കാരില്‍ ഏറെയും. കേരളത്തിലും ഇത്തരം വ്യാജ മന്ത്രവാദികള്‍ സജീവമാകുകയാണെന്നാണ്‌ വിവരം. ലോട്ടറിനമ്പര്‍ സ്‌പെഷലിസ്‌റ്റ്‌, പ്രണയ സ്‌പെഷലിസ്‌റ്റ്‌, വശീകരണം, ധനാകര്‍ഷണം, ബാധ ഒഴിപ്പിക്കല്‍ എന്നിങ്ങനെ ഒരുപിടി തട്ടിപ്പുമായാണ്‌ സൈബര്‍ മന്ത്രവാദികള്‍ കളത്തിലിറങ്ങിയിരിക്കുന്നത്‌. ഐടി പ്രഫഷണലുകളാണ്‌ കൂടുതലായും കൂടോത്രപണിയുമായി രംഗത്തുള്ളത്‌. ബ്ലാക്ക്‌ മാജിക്‌ പൂജ എന്ന്‌ ഗൂഗിളില്‍ പരിശോധിച്ചാല്‍ ലഭിക്കുന്ന നിരവധി സൈറ്റുകളില്‍ വില്‍പ്പനയ്‌ക്ക്‌ വച്ചിട്ടുള്ള വസ്‌തുക്കളുടെ സാമ്പിളുകള്‍ എണ്ണ, തിപ്പലി , രാജിരക്‌തം (ആര്‍ത്തവരക്‌തം), വിഷമുള്ളുള്ള ചമതകള്‍, നീലഉമ്മം, കടലാടി, എരിക്ക്‌, ആട്ടിന്‍രോമം, ഒട്ടകകാഷ്‌ഠം, പൂച്ചപ്പൊക്കിള്‍കൊടി എന്നിങ്ങനെയാണ്‌.

ഇതില്‍ പൂച്ചപ്പൊക്കിള്‍കൊടിക്ക്‌ ആവശ്യക്കാര്‍ ഏറെയണ്‌. കാരണം പൂച്ച പ്രസവിക്കുമ്പോള്‍ കുഞ്ഞിന്റെ പൊക്കിള്‍കൊടി അതേപടി വിഴുങ്ങുന്നതിനാല്‍ പൂച്ചപ്പൊക്കിള്‍കൊടി കിട്ടുക ദുഷ്‌കരമാണ്‌. സാധനത്തെ കുങ്കുമപ്പൊടിയില്‍ പവിത്രമായി നിക്ഷേപിച്ച്‌ ഒരു പെട്ടിയിലടച്ച്‌ പോസ്‌റ്റില്‍ എത്തിക്കും. ആഭിചാരത്തിന്‌ അത്യുത്തമമാണ്‌ കുങ്കുമത്തില്‍ കലര്‍ന്ന പൂച്ചപ്പൊക്കിള്‍ എന്നും സൈറ്റുകളില്‍ പ്രചരിപ്പിക്കുന്നു. പേട്ടുതേങ്ങ, ഇരുതലമൂരി, വെള്ളി മൂങ്ങ, നക്ഷത്ര ആമ തുടങ്ങിയവ മുതല്‍ വലംപിരി ശംഖുവരെ മന്ത്രവാദത്തിനുള്ള സര്‍വതും ഇത്തരം സൈറ്റുകളില്‍ തയ്യാറാണ്‌. ഇത്തരം വസ്‌തുക്കള്‍ ഓണ്‍ലൈനായി വാങ്ങി പോലീസിന്റെ പിടിയിലായവരും ഏറെയാണ്‌.

അറബിയായ മുതലാളിയെ കൂടോത്രം ചെയ്യാന്‍ ഓണ്‍ലൈന്‍ സൈറ്റില്‍ നിന്നും സാധനങ്ങള്‍ എത്തിച്ച മുപ്പത്തിമൂന്നു വയസുകാരനായ മലയാളി ഇന്ന്‌ സൗദി ജയിലിലാണ്‌. സ്‌പോണ്‍സര്‍ക്കെതിരേ മാരണം ചെയ്‌താല്‍ പെട്ടെന്ന്‌ ധനികനാകാം എന്ന്‌ ഒണ്‍ലൈന്‍ സന്യാസിയില്‍ നിന്നും ഉപദേശം ലഭിച്ചതിനെ തുടര്‍ന്നാണ്‌ ഇയാള്‍ ആഭിചാരത്തിനുള്ള ഏലസും കുങ്കുമത്തില്‍ കലര്‍ന്ന പൂച്ചപ്പൊക്കിളും കേരളത്തില്‍ നിന്ന്‌ സൗദിയിലേക്ക്‌ വരുത്തിച്ചത്‌. പോസ്‌റ്റല്‍ ആയി എത്തിയ കവറില്‍ സംശയാസ്‌പദമായ വസ്‌തുക്കള്‍ കണ്ടതിനെ തുടര്‍ന്ന്‌ പൊലീസിനെ വിവരം അറിയിക്കുകയായിരുന്നു.

പോസ്‌റ്റ്‌മാന്‌ പകരം പൊലീസ്‌ ഡിറ്റക്‌ടീവ്‌ ആണ്‌ കവര്‍ കൈമാറാന്‍ എത്തിയത്‌. സമ്പന്നനാകാനുള്ള വസ്‌തുക്കള്‍ ആണ്‌ കവറില്‍ ഉള്ളതെന്ന്‌ ഇയാള്‍ പോസ്‌റ്റ്‌മാനോട്‌ പറഞ്ഞു. തുടര്‍ന്ന്‌ പൊലീസ്‌ വിശദമായി ചോദ്യം ചെയ്‌തപ്പോള്‍ ഇയാള്‍ കാര്യങ്ങള്‍ വെളിപ്പെടുത്തുകയായിരുന്നു. ഓണ്‍ലൈന്‍ നിവാരണം ഉറപ്പുനല്‍കുന്ന സൈറ്റുകളില്‍ പ്രവേശിച്ചാല്‍ ചാറ്റ്‌ റൂമിലേക്ക്‌ നിങ്ങളെ ക്ഷണിക്കുന്ന ലിങ്ക്‌ പ്രത്യക്ഷപ്പെടും. അതില്‍ തൊട്ടാല്‍ തട്ടിപ്പുകാര്‍ ഉടനടി നിങ്ങളുമായി ചാറ്റ്‌ ചെയ്യാനെത്തും. ഒരു ചോദ്യത്തിന്‌ പത്തു ഡോളറാണ്‌ ചാര്‍ജ്‌. രാത്രിയെന്നോ പകലെന്നോ വ്യത്യാസമില്ലാതെ സെക്കന്‍ഡുകള്‍ക്കകം കപട ആചാര്യന്‍ ചാറ്റ്‌ റൂമില്‍ വശീകരണമന്ത്രം പറയും.

ഓണ്‍ലൈന്‍ സംശയനിവാരണസൈറ്റുകള്‍ പലതരം സേവനങ്ങള്‍ നല്‍കുന്നുണ്ട്‌. ഏത്‌ തരത്തിലുള്ള ആഭിചാരമാണ്‌ വേണ്ടതെന്ന്‌ അറിയിച്ചശേഷമാകും ചാറ്റുവഴി ഉപദേശം നല്‍കുന്നത്‌. എം.സി.എ. ഉയര്‍ന്നമാര്‍ക്കില്‍ പാസായ കൊച്ചിയിലെ ഐടി പ്രഫഷണല്‍ പല സ്‌ഥാപനങ്ങളിലും ജോലി നോക്കി. പ്രതീക്ഷിച്ച വരുമാനം നേടാതെ വന്നപ്പോള്‍ ഓണ്‍ലൈന്‍ കൂടോത്രം ചെയ്യുന്ന വെബ്‌ സൈറ്റ്‌ തുടങ്ങി. ഇപ്പോള്‍ ഇന്റര്‍നെറ്റില്‍ പേരുകേട്ട ഓണ്‍ലൈന്‍ കൂടോത്രക്കാരാനാണ്‌ കക്ഷി.

കടപ്പാട്: മംഗളം

കേന്ദ്രമന്ത്രി ഗോപിനാഥ് മുണ്ടെ വാഹനാപകടത്തില്‍ മരിച്ചു

ന്യൂഡല്‍ഹി: കേന്ദ്ര ഗ്രാമവികസനമന്ത്രിയും മുതിര്‍ന്ന ബി ജെ പി നേതാവുമായ ഗോപിനാഥ് മുണ്ടെ (64) വാഹനാപകടത്തില്‍ മരിച്ചു. ന്യൂഡല്‍ഹിയിലെ എയിംസ് ആസ്പത്രിയില്‍ ചൊവ്വാഴ്ച രാവിലെ 7.20 ന് ആയിരുന്നു അന്ത്യം. 

ഡല്‍ഹി വിമാനത്താവളത്തിലേക്ക് പോകുംവഴി രാവിലെ 6.20 നാണ് അദ്ദേഹത്തിന്റെ വാഹനം അപകടത്തില്‍പ്പെട്ടത്. കാറില്‍ മറ്റൊരുവാഹനം ഇടിച്ചു. പിന്‍സീറ്റില്‍ അദ്ദേഹം ഇരുന്ന ഭാഗത്തുതന്നെയാണ് വാഹനം ഇടിച്ചത്. ഡ്രൈവറും സഹായിയും ചേര്‍ന്നാണ് അദ്ദേഹത്തെ എയിംസില്‍ എത്തിച്ചത്. 

ആസ്പത്രിയില്‍ എത്തിച്ചപ്പോള്‍ത്തന്നെ ശ്വാസോഛ്വാസവും ഹൃദയത്തിന്റെ പ്രവര്‍ത്തനവും ഏതാണ്ട് നിലച്ചിരുന്നുവെന്ന് ഡോക്ടര്‍മാര്‍ പറഞ്ഞു. പ്രത്യേക മെഡിക്കല്‍ സംഘം ഏറെനേരം ശ്രമിച്ചുവെങ്കിലും ജീവന്‍ രക്ഷിക്കാനായില്ല. 

അദ്ദേഹത്തിന്റെ ശരീരത്തില്‍ കാര്യമായ മുറിവുകള്‍ ഉണ്ടായിരുന്നില്ലെന്ന് ഡോക്ടര്‍മാര്‍ പറഞ്ഞു. ഒപ്പം സഞ്ചരിച്ച മറ്റാര്‍ക്കും കാര്യമായ പരിക്കില്ല.